للأخصائيين المرخّصين فقط. هذي الخطة دليل مهني، ولا تُطبَّق ذاتيًا بدون مختص.
خطة علاج الاكتئاب
نرجّع العميل للأنشطة اللي تعني له شي، خطوة خطوة، بدل ما ينتظر المزاج يتحسن أول.
- الجلسات
- ١٠ إلى ١٦ جلسة حسب الشدة
- مدة الجلسة
- ٥٠ دقيقة
- الفئة
- البالغون
- النهج
- التنشيط السلوكي
نسخة تجريبية، المحتوى تحت المراجعة.
قياس التحسن
PHQ-9: بداية كل جلسة. انتبه للبند ٩ كل مرة.
قبل ما تبدأ
- قيّم خطر الانتحار في أول جلسة وكل ما ارتفع البند ٩. إذا فيه خطر، ابدأ بخطة الأمان قبل أي شي.
- الاكتئاب الشديد جدًا أو المصحوب بأعراض ذهانية أو هوس يحتاج تقييم طبي نفسي.
- الفكرة الأساسية: النشاط يسبق المزاج. لا تنتظر العميل "يحس برغبة".
تناسب مين
- اكتئاب خفيف إلى متوسط. والشديد ممكن مع متابعة طبية نفسية.
ما تناسب
- خطر انتحاري عالي يحتاج تدخل عاجل.
- ذهان أو هوس نشط.
- تعاطي نشط يمنع الالتزام بالجلسات والواجبات.
- شدة تحتاج مستوى رعاية أعلى، مثل التنويم أو المتابعة اليومية.
متى نقول تحسّن
- المؤشر الأساسي
- PHQ-9
- الاستجابة
- نزول PHQ-9 ٥٠٪ أو أكثر.
- التعافي
- PHQ-9 أقل من ٥.
- متى نمدد أو نغيّر
- إذا ما نزل المؤشر الأساسي ٢٥٪ بنص الخطة، أو ٥٠٪ بآخرها: نعيد الصياغة، أو نمدد الجلسات، أو نحيل لتقييم دوائي أو مستوى رعاية أعلى.
التكييف الثقافي
- إشراك الأسرة يكون بموافقة العميل، ونتفق معه وش يعرفون ووش لا.
- الوصمة: نسمي المشكلة بلغة بسيطة، ونوضح إن العلاج تعلّم مهارات مو "ضعف".
- التكيف الديني مصدر قوة ندعمه، بس ننتبه لا يصير سلوك أمان أو طقس.
- نحترم تفضيل جنس المعالج. التمارين برا العيادة للعميلات تترتب مع محرم أو مرافِقة إذا طلبت، وإذا صار وجود المرافق سلوك أمان نخففه بالتدريج.
- الأنشطة تنبني على قيم العميل نفسه، مثل زيارة الأهل، أو الصلاة في المسجد كنشاط اجتماعي، أو التطوع.
الجلسات
اصنع خطة لعميل- المقياس
- الأجندة
- مراجعة الواجب
- المهارة الجديدة
- الواجب الجديد
- الملخص
١التقييم وبداية الصورة
الهدف: نفهم الاكتئاب عند العميل، ونتفق على طريقة العلاج.
الآلية المستهدفة: التقييم والصياغة
في الجلسة
- تقييم الأعراض ومدتها وأثرها على الشغل والبيت والعلاقات.
- PHQ-9 وتقييم الخطر.
- نرسم معه دائرة الاكتئاب: أحداث صعبة، انسحاب وقلة نشاط، مزاج أسوأ، انسحاب أكثر.
- نشرح إن العلاج يكسر الدائرة من جهة السلوك.
الواجب: يسجل أنشطته ساعة بساعة لمدة أسبوع، ويقيّم مزاجه من ٠ إلى ١٠ مع كل نشاط.
الأدوات: الصياغة الإكلينيكية للحالة، جدول تنشيط السلوك، خطة الأمان
٢النشاط والمزاج
الهدف: يشوف العميل بنفسه العلاقة بين اللي يسويه ومزاجه.
الآلية المستهدفة: نقص التعزيز الإيجابي
في الجلسة
- نراجع السجل: متى كان المزاج أحسن ومتى أسوأ، ووش كان يسوي.
- نلاحظ الأنشطة اللي اختفت من حياته من بداية الاكتئاب.
- نبدأ نسأل عن القيم: وش يهمه في العائلة، الشغل، الصحة، الدين، الأصدقاء.
الواجب: يكمل التسجيل، ويكتب نشاط أو نشاطين لكل مجال يهمه.
الأدوات: جدول تنشيط السلوك
٣اختيار الأنشطة وجدولتها
الهدف: نحوّل القيم لأنشطة محددة ونحطها في الجدول.
الآلية المستهدفة: نقص التعزيز وغياب الروتين
في الجلسة
- نختار من القائمة أنشطة فيها متعة أو إنجاز أو قرب من القيم.
- نرتبها من الأسهل للأصعب.
- نجدول ٢ إلى ٣ أنشطة سهلة بيوم ووقت ومكان محدد.
- نتوقع العوائق من الحين ونتفق وش يسوي معها.
الواجب: ينفذ الأنشطة المجدولة ويقيّم المزاج قبل وبعد.
الأدوات: جدول تنشيط السلوك، الواجب بين الجلسات
٤المهام الكبيرة
الهدف: نتعامل مع المهام اللي يأجلها لأنها تبان أكبر من طاقته.
الآلية المستهدفة: التأجيل والتجنب
في الجلسة
- نراجع الأسبوع: وش انسوّى، ووش ما انسوّى، ووش منعه.
- نختار مهمة مؤجلة ونقسمها لخطوات صغيرة، أول خطوة ما تاخذ أكثر من ١٠ دقايق.
- نزيد عدد الأنشطة في الجدول بشكل تدريجي.
الواجب: أول خطوتين من المهمة المؤجلة، مع الأنشطة المجدولة.
الأدوات: جدول تنشيط السلوك، الواجب بين الجلسات
٥التجنب
الهدف: يلاحظ العميل متى يتجنب، ووش يكلفه هالتجنب.
الآلية المستهدفة: التجنب
في الجلسة
- نختار موقف حديث تجنبه: وش صار، وش حس، وش سوى بداله.
- نشوف وش ريّحه التجنب على المدى القصير، ووش كلفه على المدى البعيد.
- نتفق على تصرف بديل يقربه من هدفه، حتى لو المزاج ما ساعد.
الواجب: يرصد مواقف التجنب خلال الأسبوع ويجرب التصرف البديل مرتين على الأقل.
الأدوات: جدول تنشيط السلوك
٦الاجترار
الهدف: يتعامل مع الاجترار كسلوك، مو كتفكير مفيد.
الآلية المستهدفة: الاجترار
في الجلسة
- نحدد متى وين يزيد الاجترار عنده.
- نسأله: هل هالتفكير قرّبك من حل، ولا زاد الضيقة؟
- نتدرب على نقل الانتباه لتفاصيل النشاط اللي يسويه: وش يشوف ويسمع ويلمس.
- إذا الاجترار عن مشكلة لها حل، نحوّله لخطوات.
الواجب: إذا بدأ يجتر، يسجل الموقف وينتقل لنشاط أو يكتب الخطوة الجاية.
الأدوات: جدول تنشيط السلوك، خطوات حل المشكلات
٧العوائق العملية
الهدف: نحل المشاكل الواقعية اللي توقف التقدم.
الآلية المستهدفة: العوائق الواقعية
في الجلسة
- نختار مشكلة حقيقية تعيق الخطة (وقت، مال، علاقة، شغل).
- نمشي فيها بخطوات حل المشكلات: نحددها، نكتب حلول بدون حكم، نختار ونخطط.
الواجب: يجرب الحل المختار ويكتب وش صار.
الأدوات: خطوات حل المشكلات، جدول تنشيط السلوك
٨العلاقات
الهدف: نرجّع التواصل مع الناس اللي يهمونه.
الآلية المستهدفة: الانسحاب الاجتماعي
في الجلسة
- نراجع وش تغير في علاقاته من بداية الاكتئاب.
- نختار شخص أو شخصين ونخطط لتواصل بسيط (اتصال، زيارة، طلعة).
- نتدرب على الموقف إذا كان صعب عليه.
الواجب: تواصل اجتماعي واحد على الأقل، مع بقية الأنشطة المجدولة.
الأدوات: جدول تنشيط السلوك
٩مراجعة التقدم
الهدف: نشوف وش تغير ووش ساعد فعلًا.
الآلية المستهدفة: تثبيت المكاسب
في الجلسة
- نقارن PHQ-9 الحين بأول جلسة.
- يكتب العميل بكلامه الأشياء اللي ساعدته أكثر.
- نحدد الأنشطة اللي لازم تبقى ثابتة في أسبوعه بعد العلاج.
الواجب: يعبّي أول نسخة من خطة المحافظة على التحسن.
الأدوات: جدول تنشيط السلوك، بطاقات التكيّف، خطة المحافظة على التحسن
١٠المحافظة على التحسن
الهدف: خطة واضحة لو رجعت الأعراض.
الآلية المستهدفة: الانتكاس
في الجلسة
- نحدد علامات الإنذار المبكر عنده: نوم، انسحاب، تأجيل.
- وش يسوي إذا لاحظها: يرجع للجدول، يكلم شخص، يحجز موعد.
- نتفق على جلسة متابعة بعد شهر.
الواجب: يحتفظ بخطة المحافظة وبطاقة تكيّف فيها أهم ثلاث خطوات.
الأدوات: بطاقات التكيّف، خطة الأمان، خطة المحافظة على التحسن
المراجع (٤)
- Martell, C. R., Dimidjian, S., & Herman-Dunn, R. (2010). Behavioral activation for depression: A clinician's guide. Guilford Press.
- Dimidjian, S., et al. (2006). Randomized trial of behavioral activation, cognitive therapy, and antidepressant medication in the acute treatment of adults with major depression. Journal of Consulting and Clinical Psychology, 74(4), 658–670. doi
- Ekers, D., et al. (2014). Behavioural activation for depression; an update of meta-analysis of effectiveness and sub group analysis. PLoS ONE, 9(6), e100100. doi
- Richards, D. A., et al. (2016). Cost and outcome of behavioural activation versus cognitive behavioural therapy for depression (COBRA): A randomised, controlled, non-inferiority trial. The Lancet, 388(10047), 871–880. doi
للأخصائيين المرخّصين فقط. هذي الخطة دليل مهني، ولا تُطبَّق ذاتيًا بدون مختص. الخطة يعدّلها الأخصائي حسب العميل، ولا تغني عن التقييم الإكلينيكي. © ٢٠٢٦ سريرة. جميع الحقوق محفوظة.